Народная інструментальная музыка Беларусі (Палявыя запісы І. Дз. Назінай)

Светлай памяці народных музыкантаў, якія шчодра дзяліліся са мной сваімі ведамі І ДУМКАМІ.
Фальклорна-інструментальная музыка Беларусі - самабытная, разгалінаваная і неаднародная па свайму саставу і зместу частка нашай агульнай этнамузычнай спадчыны. Стваральнікам яе ў народзе па праву лічыцца яго вялікасць Музыкант, без якога не было б ні Музычных інструментаў, ні Музыкарскай (ВЫКАНАЛЬНІЦКАЙ) творчасці, ні Музыкі. Аднак гісторыя ўзнікнення і развіцця апошняй (дарэчы, як і астатніх складнікаў) знаходзіцца ў непасрэднай залежнасці не толькі ад музыканта, але і ад многіх іншых фактараў - прыродных, сацыяльных, бытавых, абраданых Таму інструментальная музыка беларусаў будзе разглядацца мной у непарыўнай сінкрэтычнай сувязі з самымі рознымі з'явамі, як уласна музычнымі, так і жыццевымі. Думаецца, што гэта дазволіць глыбей і лепей паказаць, якой была народна-інструментальная музыка ў натуральным вясковым асяроддзі да таго, пакуль амаль не знікла разам са сваімі носьбітамі і выканаўцамі - музыкантамі.
Прапанаваныя вашай увазе найгрышы былі запісаны мной падчас экспедыцый 1970 - 1990-х гг. У гэтым тэксце і каментарах да найгрышаў прыводзяцца звесткі пра музыкантаў, іх выказванні адносна зместу і функцый інструментальнай музыкі ў жыцці народа, аб антрапаморфнай сутнасці музычных інструментаў, традыцыйных формах музыкавання (выканальніцтва) і іншых пытаннях.